ਇੰਡੋਨੇਸ਼ੀਆ ’ਚ ਵੱਡਾ ਹਾਦਸਾ! 243 ਲੋਕਾਂ ਨੂੰ ਲਿਜਾ ਰਿਹਾ ਜਹਾਜ਼ ਲਾਪਤਾ, ਰੈਸਕਿਊ ਆਪਰੇਸ਼ਨ ਜਾਰੀ

ਇੰਡੋਨੇਸ਼ੀਆ ਵਿੱਚ 243 ਲੋਕਾਂ ਨੂੰ ਲੈ ਕੇ ਜਾ ਰਿਹਾ ਇੱਕ ਯਾਤਰੀ ਜਹਾਜ਼ ਐਤਵਾਰ ਨੂੰ ਲਾਪਤਾ ਹੋ ਗਿਆ। ਜਹਾਜ਼ ਨਾਲ ਜਾਵਾ ਸਾਗਰ ਵਿੱਚ ਸੰਪਰਕ ਟੁੱਟਣ ਤੋਂ ਬਾਅਦ ਅਧਿਕਾਰੀਆਂ ਨੇ ਵੱਡੇ ਪੱਧਰ 'ਤੇ ਸਰਚ ਆਪਰੇਸ਼ਨ ਸ਼ੁਰੂ ਕਰ ਦਿੱਤਾ ਹੈ। 'ਵਿਰਗੋ ਟ੍ਰਾਂਸਪੋਰਟ 8' ਨਾਮ ਦਾ ਇਹ ਜਹਾਜ਼ ਪੂਰਬੀ ਜਾਵਾ ਦੇ ਸੁਰਾਬਾਇਆ ਤੋਂ ਬੋਰਨਿਓ ਟਾਪੂ ਦੇ ਬੰਜਾਰਮਾਸਿਨ ਵੱਲ ਜਾ ਰਿਹਾ ਸੀ।

ਰੈਸਕਿਊ ਏਜੰਸੀ ਮੁਤਾਬਕ 103 ਲੋਕਾਂ ਨੂੰ ਵੱਖ-ਵੱਖ ਜਹਾਜ਼ਾਂ ਦੀ ਮਦਦ ਨਾਲ ਸੁਰੱਖਿਅਤ ਬਾਹਰ ਕੱਢ ਲਿਆ ਗਿਆ ਹੈ। ਹਾਲਾਂਕਿ ਇਨ੍ਹਾਂ ਵਿੱਚੋਂ ਇੱਕ ਵਿਅਕਤੀ ਦੀ ਮੌਤ ਹੋ ਗਈ। ਹੁਣ 140 ਲੋਕਾਂ ਦੀ ਭਾਲ ਕੀਤੀ ਜਾ ਰਹੀ ਹੈ। ਰੈਸਕਿਊ ਟੀਮ ਵੱਲੋਂ ਜਹਾਜ਼ ਦੀ ਆਖਰੀ ਲੋਕੇਸ਼ਨ ਵੱਲ ਕਈ ਜਹਾਜ਼ ਅਤੇ ਇੱਕ ਹੈਲੀਕਾਪਟਰ ਭੇਜਿਆ ਗਿਆ ਹੈ।

ਬੰਜਾਰਮਾਸਿਨ ਸਥਿਤ ਸਰਚ ਐਂਡ ਰੈਸਕਿਊ ਦਫ਼ਤਰ ਮੁਤਾਬਕ ਸਫ਼ਰ ਦੌਰਾਨ ਜਹਾਜ਼ ਵਿੱਚ ਸੰਚਾਰ ਪ੍ਰਣਾਲੀ ਫੇਲ੍ਹ ਹੋ ਗਈ ਸੀ। ਇਸ ਤੋਂ ਬਾਅਦ ਜਹਾਜ਼ ਨਾਲ ਕੋਈ ਸੰਪਰਕ ਨਹੀਂ ਹੋ ਸਕਿਆ। ਜਹਾਜ਼ ਦੀ ਆਖਰੀ ਲੋਕੇਸ਼ਨ ਜਾਵਾ ਸਾਗਰ ਵਿੱਚ ਬੰਜਾਰਮਾਸਿਨ ਦੇ ਇੱਕ ਪੀਅਰ ਤੋਂ ਲਗਭਗ 148 ਕਿਲੋਮੀਟਰ ਦੂਰ ਮਿਲੀ ਹੈ।

ਇੰਡੋਨੇਸ਼ੀਆ ਵਿੱਚ ਪਹਿਲਾਂ ਵੀ ਜਹਾਜ਼ ਡੁੱਬਣ ਦੇ ਕਈ ਵੱਡੇ ਹਾਦਸੇ ਹੋ ਚੁੱਕੇ ਹਨ। 1981 ਵਿੱਚ ਤੰਪੋਮਾਸ-2 ਨਾਮ ਦਾ ਯਾਤਰੀ ਜਹਾਜ਼ ਜਾਵਾ ਸਾਗਰ ਵਿੱਚ ਡੁੱਬ ਗਿਆ ਸੀ, ਜਿਸ ਵਿੱਚ ਲਗਭਗ 430 ਲੋਕਾਂ ਦੀ ਮੌਤ ਹੋਈ ਸੀ। 2006 ਵਿੱਚ ਸੇਨੋਪਾਤੀ ਨੁਸੰਤਾਰਾ ਨਾਮ ਦੀ ਯਾਤਰੀ ਫੈਰੀ ਖਰਾਬ ਮੌਸਮ ਦੌਰਾਨ ਜਾਵਾ ਸਾਗਰ ਵਿੱਚ ਡੁੱਬ ਗਈ ਸੀ। ਇਸ ਹਾਦਸੇ ਵਿੱਚ 400 ਤੋਂ ਵੱਧ ਲੋਕ ਮਾਰੇ ਗਏ ਜਾਂ ਲਾਪਤਾ ਹੋ ਗਏ ਸਨ। 2007 ਵਿੱਚ ਲੇਵਿਨਾ-1 ਫੈਰੀ ਵਿੱਚ ਅੱਗ ਲੱਗਣ ਤੋਂ ਬਾਅਦ ਉਹ ਡੁੱਬ ਗਈ ਸੀ, ਜਿਸ ਵਿੱਚ 50 ਤੋਂ ਵੱਧ ਲੋਕਾਂ ਦੀ ਮੌਤ ਹੋਈ ਸੀ। 2018 ਵਿੱਚ ਲੇਸਤਾਰੀ ਮਾਜੂ ਫੈਰੀ ਦੱਖਣੀ ਸੁਲਾਵੇਸੀ ਦੇ ਨੇੜੇ ਡੁੱਬ ਗਈ ਸੀ, ਜਿਸ ਵਿੱਚ 36 ਲੋਕਾਂ ਦੀ ਜਾਨ ਗਈ ਸੀ।

ਫਿਲੀਪੀਨਜ਼ ਵਿੱਚ ਫੈਰੀ ਨੂੰ ਅੱਗ ਲੱਗਣ ਨਾਲ 76 ਮੌਤਾਂ

ਇਸ ਤੋਂ ਪਹਿਲਾਂ ਬੁੱਧਵਾਰ ਰਾਤ ਫਿਲੀਪੀਨਜ਼ ਵਿੱਚ ਇੱਕ ਯਾਤਰੀ ਫੈਰੀ ਨੂੰ ਭਿਆਨਕ ਅੱਗ ਲੱਗ ਗਈ ਸੀ। ਇਸ ਹਾਦਸੇ ਵਿੱਚ ਹੁਣ ਤੱਕ 76 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ, ਜਦਕਿ 13 ਲੋਕ ਅਜੇ ਵੀ ਲਾਪਤਾ ਹਨ। ਫੈਰੀ ਵਿੱਚ ਕੁੱਲ 132 ਲੋਕ ਸਵਾਰ ਸਨ ਅਤੇ 43 ਲੋਕਾਂ ਨੂੰ ਸੁਰੱਖਿਅਤ ਬਚਾ ਲਿਆ ਗਿਆ।

ਇਹ ਫੈਰੀ ਰਾਜਧਾਨੀ ਮਨੀਲਾ ਤੋਂ ਕੋਰੋਨ ਵੱਲ ਜਾ ਰਹੀ ਸੀ ਅਤੇ ਆਪਣੀ ਮੰਜ਼ਿਲ ਤੋਂ ਲਗਭਗ 39 ਕਿਲੋਮੀਟਰ ਪਹਿਲਾਂ ਅੱਗ ਦੀ ਲਪੇਟ ਵਿੱਚ ਆ ਗਈ। ਫਿਲੀਪੀਨਜ਼ ਵਿੱਚ ਵੀ ਇੰਡੋਨੇਸ਼ੀਆ ਵਾਂਗ ਟਾਪੂਆਂ ਵਿਚਕਾਰ ਆਵਾਜਾਈ ਲਈ ਫੈਰੀ ਇੱਕ ਮਹੱਤਵਪੂਰਨ ਸਾਧਨ ਹਨ।

ਫਿਲੀਪੀਨਜ਼ ਵਿੱਚ ਪਹਿਲਾਂ ਵੀ ਕਈ ਵੱਡੇ ਸਮੁੰਦਰੀ ਹਾਦਸੇ ਹੋ ਚੁੱਕੇ ਹਨ। 1987 ਵਿੱਚ ਡੋਨਾ ਪਾਜ਼ ਫੈਰੀ ਇੱਕ ਤੇਲ ਟੈਂਕਰ ਨਾਲ ਟਕਰਾ ਕੇ ਡੁੱਬ ਗਈ ਸੀ। ਇਸ ਹਾਦਸੇ ਵਿੱਚ 4,300 ਤੋਂ ਵੱਧ ਲੋਕਾਂ ਦੀ ਮੌਤ ਹੋਈ ਸੀ। ਇਸ ਨੂੰ ਸ਼ਾਂਤੀ ਦੇ ਸਮੇਂ ਦੌਰਾਨ ਵਾਪਰੇ ਦੁਨੀਆ ਦੇ ਸਭ ਤੋਂ ਘਾਤਕ ਸਮੁੰਦਰੀ ਹਾਦਸਿਆਂ ਵਿੱਚੋਂ ਇੱਕ ਮੰਨਿਆ ਜਾਂਦਾ ਹੈ।