ਹੁਣ Canada ’ਚ ਹੋ ਸਕੇਗਾ ਅਸਥੀਆਂ ਦਾ ਵਿਸਰਜਨ, ਭਾਰਤੀਆਂ ਲਈ ਵੱਡੀ ਸਹੂਲਤ, 21 ਸਤੰਬਰ ਤੋਂ ਬੁਕਿੰਗ ਸ਼ੁਰੂ

ਕੈਨੇਡਾ 'ਚ ਰਹਿਣ ਵਾਲੇ ਪੰਜਾਬੀਆਂ ਅਤੇ ਭਾਰਤੀ ਭਾਈਚਾਰੇ ਲਈ ਇੱਕ ਵੱਡੀ ਖ਼ਬਰ ਹੈ। ਆਪਣੇ ਵਿਛੜੇ ਪਰਿਵਾਰਕ ਮੈਂਬਰਾਂ ਦੀਆਂ ਅਸਥੀਆਂ ਦੇ ਵਿਸਰਜਨ ਨਾਲ ਜੁੜੀ ਵੱਡੀ ਭਾਵਨਾਤਮਕ ਮੁਸ਼ਕਲ ਹੁਣ ਘੱਟ ਹੋਣ ਜਾ ਰਹੀ ਹੈ। ਸਰੀ ਸਿਟੀ ਨੇ ਨਦੀ 'ਚ ਅਸਥੀਆਂ ਦੇ ਵਿਸਰਜਨ ਲਈ ਵਿਵਸਥਾ ਸ਼ੁਰੂ ਕਰ ਦਿੱਤੀ ਹੈ।

ਅਸਥੀ ਵਿਸਰਜਨ ਲਈ ਇਹ ਅਧਿਕਾਰਤ ਸਥਾਨ ਸਰੀ ਪਬਲਿਕ ਵਾਰਫ 'ਤੇ ਤਿਆਰ ਕੀਤਾ ਗਿਆ ਹੈ। ਇੱਥੇ ਪਰਿਵਾਰ ਨਿਰਧਾਰਤ ਪ੍ਰਬੰਧਾਂ ਤਹਿਤ ਨਦੀ ਦੇ ਪਾਣੀ ਵਿੱਚ ਅਸਥੀਆਂ ਵਿਸਰਜਿਤ ਕਰ ਸਕਣਗੇ।ਇਸ ਸਹੂਲਤ ਲਈ ਪਰਿਵਾਰਾਂ ਨੂੰ ਪਹਿਲਾਂ ਤੋਂ ਆਨਲਾਈਨ ਬੁਕਿੰਗ ਕਰਵਾਉਣੀ ਪਵੇਗੀ। ਸਰੀ ਸਿਟੀ ਮੁਤਾਬਕ, 21 ਸਤੰਬਰ ਤੋਂ ਬੁਕਿੰਗ ਰਿਕਵੈਸਟ ਸਵੀਕਾਰ ਕੀਤੀ ਜਾਵੇਗੀ।

ਇਸ ਸਹੂਲਤ ਦੇ ਸ਼ੁਰੂ ਹੋਣ ਨਾਲ ਹੁਣ ਪਰਿਵਾਰਾਂ ਨੂੰ ਅਸਥੀਆਂ ਦੇ ਵਿਸਰਜਨ ਲਈ ਭਾਰਤ ਆਉਣ ਦੀ ਲੋੜ ਨਹੀਂ ਪਵੇਗੀ। ਪਰਿਵਾਰ ਸਰੀ ਵਿੱਚ ਹੀ ਨਿਰਧਾਰਤ ਸਥਾਨ 'ਤੇ ਧਾਰਮਿਕ ਰੀਤੀ-ਰਿਵਾਜਾਂ ਅਨੁਸਾਰ ਆਪਣੇ ਵਿਛੜੇ ਪਰਿਵਾਰਕ ਮੈਂਬਰ ਦੀਆਂ ਅਸਥੀਆਂ ਦਾ ਵਿਸਰਜਨ ਕਰ ਸਕਣਗੇ।

ਇੱਕ ਸੇਰੇਮਨੀ ਲਈ 237 ਡਾਲਰ ਫੀਸ

ਅਸਥੀ ਵਿਸਰਜਨ ਲਈ ਸਰੀ ਸਿਟੀ ਵੱਲੋਂ 237 ਕੈਨੇਡੀਅਨ ਡਾਲਰ ਦੀ ਫੀਸ ਤੈਅ ਕੀਤੀ ਗਈ ਹੈ, ਜੋ ਭਾਰਤੀ ਕਰੰਸੀ ਵਿੱਚ ਲਗਭਗ 14,500 ਰੁਪਏ ਬਣਦੀ ਹੈ। ਇਸ ਫੀਸ ਵਿੱਚ ਬੁਕਿੰਗ ਮੈਨੇਜਮੈਂਟ, ਸਾਈਟ ਦੀ ਤਿਆਰੀ ਅਤੇ ਸਿਟੀ ਸਟਾਫ ਦੀ ਨਿਗਰਾਨੀ ਵਰਗੀਆਂ ਸਹੂਲਤਾਂ ਸ਼ਾਮਲ ਹਨ। ਇੱਕ ਸਮੇਂ 'ਤੇ ਇੱਕ ਹੀ ਪਰਿਵਾਰ ਨੂੰ ਸਾਈਟ ਦੀ ਵਰਤੋਂ ਕਰਨ ਦੀ ਇਜਾਜ਼ਤ ਹੋਵੇਗੀ। ਸੇਰੇਮਨੀ ਦੌਰਾਨ ਸਰੀ ਸਿਟੀ ਦਾ ਇੱਕ ਸਟਾਫ ਮੈਂਬਰ ਵੀ ਮੌਜੂਦ ਰਹੇਗਾ।

ਮੌਸਮ ਅਤੇ ਪਾਣੀ ਦੀ ਸਥਿਤੀ ਦੇ ਆਧਾਰ 'ਤੇ ਬਦਲ ਸਕਦੀ ਹੈ ਸੇਰੇਮਨੀ

ਸਰੀ ਸਿਟੀ ਨੇ ਇਹ ਪ੍ਰਬੰਧ ਇਸ ਤਰ੍ਹਾਂ ਕੀਤਾ ਹੈ ਕਿ ਪਰਿਵਾਰਾਂ ਨੂੰ ਨਿੱਜੀ ਅਤੇ ਸ਼ਾਂਤ ਮਾਹੌਲ ਮਿਲ ਸਕੇ ਅਤੇ ਪਾਰਕ ਦੀ ਵਰਤੋਂ ਕਰਨ ਵਾਲੇ ਹੋਰ ਲੋਕਾਂ ਨੂੰ ਵੀ ਪਰੇਸ਼ਾਨੀ ਨਾ ਹੋਵੇ।ਪਰਿਵਾਰਾਂ ਨੂੰ ਨਿਰਧਾਰਤ ਸਮੇਂ 'ਤੇ ਸਾਈਟ 'ਤੇ ਪਹੁੰਚਣਾ ਹੋਵੇਗਾ ਅਤੇ ਸਿਟੀ ਸਟਾਫ ਵੱਲੋਂ ਦਿੱਤੀਆਂ ਹਦਾਇਤਾਂ ਦੀ ਪਾਲਣਾ ਕਰਨੀ ਪਵੇਗੀ। ਮੌਸਮ, ਜਵਾਰ ਅਤੇ ਪਾਣੀ ਦੀ ਸਥਿਤੀ ਨੂੰ ਦੇਖਦੇ ਹੋਏ ਸਰੀ ਸਿਟੀ ਕਿਸੇ ਸੇਰੇਮਨੀ ਨੂੰ ਰੱਦ ਵੀ ਕਰ ਸਕਦੀ ਹੈ। ਇਸ ਤੋਂ ਇਲਾਵਾ, ਅਸਥੀਆਂ ਤੋਂ ਇਲਾਵਾ ਹੋਰ ਸਮੱਗਰੀ ਜਾਂ ਪੂਜਾ ਸਮੱਗਰੀ ਨੂੰ ਨਦੀ ਵਿੱਚ ਸੁੱਟਣ ਦੀ ਇਜਾਜ਼ਤ ਨਹੀਂ ਹੋਵੇਗੀ। ਪਰਿਵਾਰਾਂ ਨੂੰ ਸਾਈਟ 'ਤੇ ਲੱਗੀਆਂ ਸਾਰੀਆਂ ਹਦਾਇਤਾਂ ਦੀ ਪਾਲਣਾ ਕਰਨੀ ਲਾਜ਼ਮੀ ਹੋਵੇਗੀ।

2.5 ਮਿਲੀਅਨ ਡਾਲਰ ਦਾ ਪਾਇਲਟ ਪ੍ਰੋਜੈਕਟ

ਸਰੀ ਦੀ ਮੇਅਰ ਬ੍ਰੈਂਡਾ ਲੋਕ ਨੇ ਇਸ ਨੂੰ ਇੱਕ ਸੰਵੇਦਨਸ਼ੀਲ ਅਤੇ ਸਨਮਾਨਜਨਕ ਪਹਿਲ ਦੱਸਿਆ ਹੈ। ਉਨ੍ਹਾਂ ਮੁਤਾਬਕ, ਇਸ ਸਹੂਲਤ ਨਾਲ ਪਰਿਵਾਰ ਆਪਣੇ ਵਿਛੜੇ ਪਰਿਵਾਰਕ ਮੈਂਬਰਾਂ ਨੂੰ ਸ਼ਾਂਤੀ ਅਤੇ ਸਨਮਾਨ ਨਾਲ ਅੰਤਿਮ ਵਿਦਾਈ ਦੇ ਸਕਣਗੇ। ਇਹ ਪ੍ਰੋਜੈਕਟ 2.5 ਮਿਲੀਅਨ ਕੈਨੇਡੀਅਨ ਡਾਲਰ ਦੇ ਬਜਟ ਨਾਲ ਤਿਆਰ ਕੀਤਾ ਗਿਆ ਹੈ ਅਤੇ ਇਸ ਨੂੰ ਫਿਲਹਾਲ ਇੱਕ ਸਾਲ ਦੇ ਪਾਇਲਟ ਪ੍ਰੋਜੈਕਟ ਵਜੋਂ ਸ਼ੁਰੂ ਕੀਤਾ ਗਿਆ ਹੈ। ਆਉਣ ਵਾਲੇ ਸਾਲਾਂ ਵਿੱਚ ਇਸ ਸਹੂਲਤ ਨੂੰ ਹੋਰ ਵਿਕਸਤ ਕਰਨ ਦੀ ਯੋਜਨਾ ਹੈ।