ਕੈਨੇਡਾ ਤੋਂ 8 ਸਾਲ ਬਾਅਦ ਪੰਜਾਬੀ ਪਰਿਵਾਰ ਡਿਪੋਰਟ,ਕੈਨੇਡਾ ਸਰਕਾਰ ਦਾ ਸਖ਼ਤ ਫੈਸਲਾ

ਜਲੰਧਰ ਜ਼ਿਲ੍ਹੇ ਦੇ ਗੋਰਾਇਆ ਨਾਲ ਸਬੰਧਤ ਇੱਕ ਪੰਜਾਬੀ ਪਰਿਵਾਰ ਨੂੰ ਕੈਨੇਡਾ ਵਿੱਚ ਕਰੀਬ 8 ਸਾਲ ਬਿਤਾਉਣ ਤੋਂ ਬਾਅਦ ਭਾਰਤ ਵਾਪਸ ਪਰਤਣਾ ਪਿਆ। ਹਰੀਸ਼ ਕੁਮਾਰ, ਉਨ੍ਹਾਂ ਦੀ ਪਤਨੀ ਸੋਨਿਕਾ ਅਤੇ ਦੋ ਪੁੱਤਰ ਗੌਰੇਸ਼ ਤੇ ਜਾਪੇਸ਼ ਅਪ੍ਰੈਲ 2018 ਵਿੱਚ ਕਿਊਬੈਕ ਪਹੁੰਚੇ ਸਨ। ਪਰਿਵਾਰ ਨੇ ਕੈਨੇਡਾ ਵਿੱਚ ਸ਼ਰਨਾਰਥੀ ਦਰਜਾ ਹਾਸਲ ਕਰਨ ਲਈ ਅਰਜ਼ੀ ਦਿੱਤੀ ਸੀ, ਪਰ ਦਾਅਵਾ ਰੱਦ ਹੋਣ ਤੋਂ ਬਾਅਦ ਉਨ੍ਹਾਂ ਨੂੰ ਦੇਸ਼ ਛੱਡਣ ਦਾ ਹੁਕਮ ਮਿਲਿਆ।

ਪਰਿਵਾਰ 7 ਸਤੰਬਰ 2026 ਨੂੰ ਕੈਨੇਡਾ ਤੋਂ ਭਾਰਤ ਲਈ ਰਵਾਨਾ ਹੋਇਆ। ਦੇਸ਼ ਛੱਡਣ ਤੋਂ ਪਹਿਲਾਂ ਹਰੀਸ਼ ਕੁਮਾਰ ਨੇ ਆਪਣਾ ਦੁੱਖ ਜ਼ਾਹਰ ਕਰਦਿਆਂ ਕਿਹਾ ਕਿ ਉਹ ਇਸ ਸਥਿਤੀ ਕਾਰਨ ਬਹੁਤ ਉਦਾਸ ਹਨ। ਉਨ੍ਹਾਂ ਮੁਤਾਬਕ, ਉਹ ਆਪਣੀ ਜਾਨ ਨੂੰ ਖ਼ਤਰਾ ਹੋਣ ਦੇ ਡਰ ਕਾਰਨ ਭਾਰਤ ਛੱਡ ਕੇ ਕੈਨੇਡਾ ਗਏ ਸਨ।

ਇਸ ਪੂਰੇ ਮਾਮਲੇ ਦਾ ਸਭ ਤੋਂ ਵੱਧ ਅਸਰ ਪਰਿਵਾਰ ਦੇ ਦੋਵੇਂ ਬੱਚਿਆਂ 'ਤੇ ਪਿਆ ਹੈ। 14 ਸਾਲਾ ਜਾਪੇਸ਼ ਜਦੋਂ ਕੈਨੇਡਾ ਗਿਆ ਸੀ ਤਾਂ ਉਸ ਦੀ ਉਮਰ ਸਿਰਫ਼ 6 ਸਾਲ ਸੀ। ਉਸ ਨੇ ਆਪਣਾ ਬਚਪਨ ਕਿਊਬੈਕ ਵਿੱਚ ਗੁਜ਼ਾਰਿਆ, ਉੱਥੇ ਸਕੂਲ ਪੜ੍ਹਿਆ ਅਤੇ ਉਸ ਦੇ ਦੋਸਤ ਵੀ ਉੱਥੇ ਹੀ ਹਨ। ਭਾਰਤ ਵਾਪਸੀ ਬਾਰੇ ਗੱਲ ਕਰਦਿਆਂ ਉਸ ਨੇ ਕਿਹਾ ਕਿ ਉਹ ਭਾਰਤ ਨੂੰ ਬਹੁਤ ਘੱਟ ਜਾਣਦਾ ਹੈ।

ਉਸ ਦੇ 12 ਸਾਲਾ ਭਰਾ ਗੌਰੇਸ਼ ਦੀ ਸਥਿਤੀ ਵੀ ਕੁਝ ਅਜਿਹੀ ਹੀ ਹੈ। ਉਸ ਨੇ ਕਿਹਾ ਕਿ ਉਸ ਨੂੰ ਭਾਰਤ ਬਾਰੇ ਬਹੁਤ ਘੱਟ ਪਤਾ ਹੈ ਅਤੇ ਹੁਣ ਉਸ ਨੂੰ ਇੱਥੇ ਆ ਕੇ ਜ਼ਿੰਦਗੀ ਮੁੜ ਤੋਂ ਸ਼ੁਰੂ ਕਰਨੀ ਪਵੇਗੀ। ਦੋਵਾਂ ਬੱਚਿਆਂ ਲਈ ਕੈਨੇਡਾ ਹੀ ਉਹ ਥਾਂ ਰਹੀ ਹੈ ਜਿੱਥੇ ਉਨ੍ਹਾਂ ਨੇ ਆਪਣਾ ਜ਼ਿਆਦਾਤਰ ਬਚਪਨ ਬਿਤਾਇਆ।

ਪਰਿਵਾਰ ਨੂੰ 4 ਅਗਸਤ ਨੂੰ ਪਤਾ ਲੱਗਾ ਕਿ ਉਨ੍ਹਾਂ ਦੀ ਸ਼ਰਨਾਰਥੀ ਅਰਜ਼ੀ ਰੱਦ ਕਰ ਦਿੱਤੀ ਗਈ ਹੈ ਅਤੇ 7 ਸਤੰਬਰ ਤੱਕ ਕੈਨੇਡਾ ਛੱਡਣਾ ਹੋਵੇਗਾ। ਰਵਾਨਗੀ ਤੋਂ ਲਗਭਗ ਇੱਕ ਹਫ਼ਤਾ ਪਹਿਲਾਂ ਕੈਨੇਡਾ ਬਾਰਡਰ ਸਰਵਿਸਿਜ਼ ਏਜੰਸੀ (CBSA) ਨੇ ਹਰੀਸ਼ ਕੁਮਾਰ ਦੀ ਪਤਨੀ ਸੋਨਿਕਾ ਨੂੰ ਵੀ ਹਿਰਾਸਤ ਵਿੱਚ ਲੈ ਲਿਆ ਸੀ। ਇਸ ਤੋਂ ਬਾਅਦ ਆਖ਼ਰਕਾਰ ਪਰਿਵਾਰ ਨੂੰ ਕੈਨੇਡਾ ਛੱਡ ਕੇ ਭਾਰਤ ਵਾਪਸ ਆਉਣਾ ਪਿਆ।