ਧਨਤੇਰਸ 2026: ਦੋ ਦਿਨ ਖਰੀਦਦਾਰੀ ਦਾ ਸ਼ੁਭ ਮੁਹੂਰਤ, ਜਾਣੋ ਕਿਉਂ ਖਰੀਦੇ ਜਾਂਦੇ ਹਨ ਧਨੀਆ ਅਤੇ ਝਾੜੂ!

ਅੱਜ 6 ਨਵੰਬਰ, ਸ਼ੁੱਕਰਵਾਰ ਨੂੰ ਧਨਤੇਰਸ ਦਾ ਤਿਉਹਾਰ ਮਨਾਇਆ ਜਾ ਰਿਹਾ ਹੈ। ਦੀਵਾਲੀ ਤੋਂ ਪਹਿਲਾਂ ਆਉਣ ਵਾਲਾ ਇਹ ਤਿਉਹਾਰ ਧਨ, ਸਿਹਤ ਅਤੇ ਸੁੱਖ-ਸਮ੍ਰਿੱਧੀ ਦਾ ਪ੍ਰਤੀਕ ਮੰਨਿਆ ਜਾਂਦਾ ਹੈ। ਇਸ ਵਾਰ ਤ੍ਰਯੋਦਸ਼ੀ ਤਿਥੀ ਦੋ ਦਿਨ ਹੋਣ ਕਾਰਨ ਧਨਤੇਰਸ ਦਾ ਤਿਉਹਾਰ 6 ਅਤੇ 7 ਨਵੰਬਰ ਨੂੰ ਮਨਾਇਆ ਜਾਵੇਗਾ।

ਦੋਵਾਂ ਦਿਨਾਂ ਵਿੱਚ ਪੂਜਾ ਅਤੇ ਖਰੀਦਦਾਰੀ ਲਈ ਚਾਰ-ਚਾਰ ਸ਼ੁਭ ਮੁਹੂਰਤ ਹੋਣਗੇ। ਹਰ ਮੁਹੂਰਤ ਲਗਭਗ ਡੇਢ ਘੰਟੇ ਦਾ ਹੋਵੇਗਾ।ਧਨਤੇਰਸ ਦੇ ਦਿਨ ਭਗਵਾਨ ਧਨਵੰਤਰੀ, ਮਾਤਾ ਲਕਸ਼ਮੀ, ਭਗਵਾਨ ਕੁਬੇਰ ਅਤੇ ਮੌਤ ਦੇ ਦੇਵਤਾ ਯਮਰਾਜ ਦੀ ਪੂਜਾ ਕਰਨ ਦਾ ਵਿਧਾਨ ਹੈ।

ਮਾਨਤਾ ਹੈ ਕਿ ਇਸ ਦਿਨ ਸ਼ੁਭ ਮੁਹੂਰਤ ਵਿੱਚ ਪੂਜਾ ਅਤੇ ਖਰੀਦਦਾਰੀ ਕਰਨ ਨਾਲ ਘਰ ਵਿੱਚ ਸੁੱਖ-ਸਮ੍ਰਿੱਧੀ ਆਉਂਦੀ ਹੈ। ਇਸੇ ਕਾਰਨ ਲੋਕ ਇਸ ਦਿਨ ਸੋਨਾ-ਚਾਂਦੀ, ਬਰਤਨ, ਵਾਹਨ ਅਤੇ ਹੋਰ ਨਵੀਆਂ ਚੀਜ਼ਾਂ ਖਰੀਦਦੇ ਹਨ। ਧਾਰਮਿਕ ਮਾਨਤਾ ਅਨੁਸਾਰ ਇਸ ਦਿਨ ਖਰੀਦੀਆਂ ਗਈਆਂ ਚੀਜ਼ਾਂ ਵਿੱਚ ਲਗਾਤਾਰ ਵਾਧਾ ਹੁੰਦਾ ਰਹਿੰਦਾ ਹੈ।

ਧਨਤੇਰਸ 'ਤੇ ਧਨੀਆ ਅਤੇ ਝਾੜੂ ਖਰੀਦਣ ਦੀ ਪਰੰਪਰਾ

ਪਦਮ ਪੁਰਾਣ ਅਤੇ ਸਕੰਦ ਪੁਰਾਣ ਵਿੱਚ ਮਾਤਾ ਲਕਸ਼ਮੀ ਨੂੰ ਅੰਨ ਅਤੇ ਧਨ-ਅਨਾਜ ਵਿੱਚ ਵਾਧਾ ਕਰਨ ਵਾਲੀ ਦੇਵੀ ਦੱਸਿਆ ਗਿਆ ਹੈ। ਧਨੀਆ ਦੇ ਬੀਜ ਵੀ ਅੰਕੁਰਿਤ ਹੋ ਕੇ ਵਧਦੇ ਹਨ। ਇਸ ਲਈ ਇਨ੍ਹਾਂ ਨੂੰ ਆਮਦਨ ਅਤੇ ਸੰਪਤੀ ਵਿੱਚ ਵਾਧੇ ਦਾ ਪ੍ਰਤੀਕ ਮੰਨਿਆ ਜਾਂਦਾ ਹੈ। ਇਸ ਮਾਨਤਾ ਦੇ ਚਲਦਿਆਂ ਧਨਤੇਰਸ ਮੌਕੇ ਸਾਬਤ ਧਨੀਆ ਖਰੀਦਣ ਦੀ ਪਰੰਪਰਾ ਹੈ।

ਇਸ ਤੋਂ ਇਲਾਵਾ ਧਨਤੇਰਸ 'ਤੇ ਝਾੜੂ ਖਰੀਦਣ ਦਾ ਵੀ ਰਿਵਾਜ ਹੈ। ਹਾਲਾਂਕਿ ਕਿਸੇ ਧਾਰਮਿਕ ਗ੍ਰੰਥ ਵਿੱਚ ਇਸ ਦਾ ਸਿੱਧਾ ਜ਼ਿਕਰ ਨਹੀਂ ਮਿਲਦਾ, ਪਰ ਲੋਕ ਮਾਨਤਾ ਅਨੁਸਾਰ ਝਾੜੂ ਘਰ ਵਿੱਚੋਂ ਗਰੀਬੀ, ਨਕਾਰਾਤਮਕਤਾ ਅਤੇ ਦੁੱਖਾਂ ਨੂੰ ਬਾਹਰ ਕੱਢਣ ਦਾ ਪ੍ਰਤੀਕ ਮੰਨੀ ਜਾਂਦੀ ਹੈ।

ਧਨਤੇਰਸ 2026: ਖਰੀਦਦਾਰੀ ਦਾ ਸ਼ੁਭ ਮੁਹੂਰਤ

ਇਸ ਵਾਰ ਧਨਤੇਰਸ 'ਤੇ ਖਰੀਦਦਾਰੀ ਦਾ ਸ਼ੁਭ ਸਮਾਂ 6 ਅਤੇ 7 ਨਵੰਬਰ ਦੋਵਾਂ ਦਿਨ ਰਹੇਗਾ। ਤ੍ਰਯੋਦਸ਼ੀ ਤਿਥੀ 6 ਨਵੰਬਰ ਦੀ ਸਵੇਰ 10 ਵੱਜ ਕੇ 30 ਮਿੰਟ ਤੋਂ ਸ਼ੁਰੂ ਹੋ ਕੇ 7 ਨਵੰਬਰ ਦੀ ਸਵੇਰ 10 ਵੱਜ ਕੇ 49 ਮਿੰਟ ਤੱਕ ਰਹੇਗੀ।

ਜਿਹੜੇ ਲੋਕ 6 ਨਵੰਬਰ ਯਾਨੀ ਅੱਜ ਖਰੀਦਦਾਰੀ ਕਰਨਾ ਚਾਹੁੰਦੇ ਹਨ, ਉਹ ਦਿਨ ਵਿੱਚ ਕਿਸੇ ਵੀ ਸਮੇਂ ਸਾਮਾਨ ਖਰੀਦ ਸਕਦੇ ਹਨ। ਉੱਥੇ ਹੀ 7 ਨਵੰਬਰ ਨੂੰ ਖਰੀਦਦਾਰੀ ਕਰਨ ਵਾਲਿਆਂ ਲਈ ਸਵੇਰੇ 10 ਵੱਜ ਕੇ 49 ਮਿੰਟ ਤੱਕ ਸ਼ੁਭ ਸਮਾਂ ਰਹੇਗਾ, ਕਿਉਂਕਿ ਇਸ ਤੋਂ ਬਾਅਦ ਤ੍ਰਯੋਦਸ਼ੀ ਤਿਥੀ ਸਮਾਪਤ ਹੋ ਜਾਵੇਗੀ।

ਦੀਵਾਲੀ ਤੱਕ ਨਾ ਕਰੋ ਨਵੀਆਂ ਚੀਜ਼ਾਂ ਦੀ ਵਰਤੋਂ

ਮਾਨਤਾ ਅਨੁਸਾਰ ਧਨਤੇਰਸ ਵਾਲੇ ਦਿਨ ਖਰੀਦੀਆਂ ਗਈਆਂ ਚੀਜ਼ਾਂ ਦੀ ਵਰਤੋਂ ਦੀਵਾਲੀ ਤੱਕ ਨਹੀਂ ਕਰਨੀ ਚਾਹੀਦੀ। ਦੀਵਾਲੀ ਦੀ ਪੂਜਾ ਸਮੇਂ ਇਨ੍ਹਾਂ ਚੀਜ਼ਾਂ ਨੂੰ ਮਾਤਾ ਲਕਸ਼ਮੀ ਦੇ ਸਾਹਮਣੇ ਰੱਖ ਕੇ ਪੂਜਾ ਕਰਨੀ ਚਾਹੀਦੀ ਹੈ। ਇਸ ਤੋਂ ਬਾਅਦ ਹੀ ਇਨ੍ਹਾਂ ਨੂੰ ਵਰਤੋਂ ਵਿੱਚ ਲਿਆਉਣਾ ਸ਼ੁਭ ਮੰਨਿਆ ਜਾਂਦਾ ਹੈ।