ਅਫ਼ਗ਼ਾਨਿਸਤਾਨ 'ਤੇ ਜਿੱਤ ਦੇ ਨਾਲ ਹੀ ਅਭਿਸ਼ੇਕ ਸ਼ਰਮਾ ਨੇ ਰਚਿਆ ਇਤਿਹਾਸ, ਕਈ ਰਿਕਾਰਡ ਕੀਤੇ ਆਪਣੇ ਨਾਮ

ਅਫ਼ਗ਼ਾਨਿਸਤਾਨ ਖਿਲਾਫ਼ ਖੇਡੇ ਤੀਜੇ T20 ਮੈਚ ਨੂੰ ਭਾਰਤ ਨੇ ਜਿੱਤ ਲਿਆ ਹੈ ਇਸਦੇ ਨਾਲ ਹੀ ਇਸ ਮੈਚ ਦੌਰਾਨ ਭਾਰਤੀ ਖਿਡਾਰੀਆਂ ਨੇ ਕਈ ਰਿਕਾਰਡ ਬਣਾਏ। ਦਿੱਲੀ ਵਿੱਚ ਖੇਡੇ ਗਏ ਇਸ ਮੁਕਾਬਲੇ ਵਿੱਚ ਭਾਰਤੀ ਓਪਨਰ ਅਭਿਸ਼ੇਕ ਸ਼ਰਮਾ ਨੇ 108 ਦੌੜਾਂ ਦੀ ਤੂਫ਼ਾਨੀ ਪਾਰੀ ਖੇਡੀ।

ਅਭਿਸ਼ੇਕ ਸ਼ਰਮਾ ਟੀ-20 ਇੰਟਰਨੈਸ਼ਨਲ ਵਿੱਚ ਪਾਵਰਪਲੇ ਦੌਰਾਨ ਸਭ ਤੋਂ ਜ਼ਿਆਦਾ ਦੌੜਾਂ ਬਣਾਉਣ ਵਾਲੇ ਬੱਲੇਬਾਜ਼ ਬਣ ਗਏ। ਇਸ ਤੋਂ ਇਲਾਵਾ ਓਵਰਆਲ ਟੀ-20 ਕ੍ਰਿਕਟ ਵਿੱਚ ਸਭ ਤੋਂ ਵੱਧ ਸੈਂਕੜੇ ਲਗਾਉਣ ਵਾਲੇ ਭਾਰਤੀ ਬੱਲੇਬਾਜ਼ਾਂ ਦੀ ਸੂਚੀ ਵਿੱਚ ਉਨ੍ਹਾਂ ਨੇ ਵਿਰਾਟ ਕੋਹਲੀ ਦੀ ਬਰਾਬਰੀ ਕਰ ਲਈ ਹੈ। ਦੋਵਾਂ ਦੇ ਨਾਮ ਹੁਣ 10-10 ਟੀ-20 ਸੈਂਕੜੇ ਹਨ।

ਅਭਿਸ਼ੇਕ ਨੇ 30 ਗੇਂਦਾਂ 'ਤੇ ਲਗਾਇਆ ਸੈਂਕੜਾ

ਅਭਿਸ਼ੇਕ ਨੇ ਸਿਰਫ਼ 30 ਗੇਂਦਾਂ 'ਤੇ ਸੈਂਕੜਾ ਲਗਾ ਕੇ ਰੋਹਿਤ ਸ਼ਰਮਾ ਦਾ ਭਾਰਤੀ ਰਿਕਾਰਡ ਤੋੜ ਦਿੱਤਾ। ਰੋਹਿਤ ਨੇ 2017 ਵਿੱਚ 35 ਗੇਂਦਾਂ 'ਤੇ ਸੈਂਕੜਾ ਲਗਾਇਆ ਸੀ। ਇਸ ਦੇ ਨਾਲ ਹੀ ਅਭਿਸ਼ੇਕ ਫੁੱਲ ਮੈਂਬਰ ਦੇਸ਼ਾਂ ਵਿਚਕਾਰ ਟੀ-20 ਇੰਟਰਨੈਸ਼ਨਲ ਵਿੱਚ ਸਭ ਤੋਂ ਤੇਜ਼ ਸੈਂਕੜਾ ਲਗਾਉਣ ਵਾਲੇ ਬੱਲੇਬਾਜ਼ ਵੀ ਬਣ ਗਏ। ਇਸ ਤੋਂ ਪਹਿਲਾਂ ਇਹ ਰਿਕਾਰਡ ਜ਼ਿੰਬਾਬਵੇ ਦੇ ਸਿਕੰਦਰ ਰਜ਼ਾ ਅਤੇ ਨਿਊਜ਼ੀਲੈਂਡ ਦੇ ਫਿਨ ਐਲਨ ਦੇ ਨਾਮ ਸੀ, ਜਿਨ੍ਹਾਂ ਨੇ 33-33 ਗੇਂਦਾਂ 'ਤੇ ਸੈਂਕੜੇ ਲਗਾਏ ਸਨ।

ਪਾਵਰਪਲੇ ਵਿੱਚ 76 ਦੌੜਾਂ

ਅਭਿਸ਼ੇਕ ਨੇ ਦਿੱਲੀ ਵਿੱਚ ਪਾਵਰਪਲੇ ਦੇ 6 ਓਵਰਾਂ ਦੌਰਾਨ ਸਿਰਫ਼ 22 ਗੇਂਦਾਂ 'ਤੇ ਨਾਬਾਦ 76 ਦੌੜਾਂ ਬਣਾਈਆਂ। ਇਹ ਪੁਰਸ਼ਾਂ ਦੇ ਟੀ-20 ਇੰਟਰਨੈਸ਼ਨਲ ਵਿੱਚ ਪਾਵਰਪਲੇ ਦੌਰਾਨ ਕਿਸੇ ਬੱਲੇਬਾਜ਼ ਵੱਲੋਂ ਬਣਾਇਆ ਗਿਆ ਸਭ ਤੋਂ ਵੱਡਾ ਸਕੋਰ ਹੈ। ਇਸ ਸੂਚੀ ਵਿੱਚ ਪੁਰਤਗਾਲ ਦੇ ਕੁਲਦੀਪ ਘੋਲੀਆ 74 ਦੌੜਾਂ ਨਾਲ ਦੂਜੇ ਸਥਾਨ 'ਤੇ ਹਨ।

16 ਗੇਂਦਾਂ 'ਤੇ ਅਰਧ ਸੈਂਕੜਾ

ਅਭਿਸ਼ੇਕ ਨੇ ਇਸ ਮੈਚ ਵਿੱਚ ਸਿਰਫ਼ 16 ਗੇਂਦਾਂ 'ਤੇ ਫਿਫਟੀ ਪੂਰੀ ਕੀਤੀ। ਟੀ-20 ਇੰਟਰਨੈਸ਼ਨਲ ਵਿੱਚ ਇਹ ਉਨ੍ਹਾਂ ਦੀ ਛੇਵੀਂ ਫਿਫਟੀ ਹੈ ਜੋ 20 ਜਾਂ ਇਸ ਤੋਂ ਘੱਟ ਗੇਂਦਾਂ 'ਤੇ ਆਈ ਹੈ। ਇਸ ਮਾਮਲੇ ਵਿੱਚ ਉਹ ਵਿਸ਼ਵ ਕ੍ਰਿਕਟ ਵਿੱਚ ਸਭ ਤੋਂ ਅੱਗੇ ਹਨ। ਇਸ ਦੇ ਨਾਲ ਹੀ ਇਹ ਭਾਰਤ ਲਈ ਟੀ-20 ਵਿੱਚ ਪੰਜਵਾਂ ਸਭ ਤੋਂ ਤੇਜ਼ ਅਰਧ ਸੈਂਕੜਾ ਹੈ। ਇਸ ਸੂਚੀ ਵਿੱਚ ਯੁਵਰਾਜ ਸਿੰਘ ਪਹਿਲੇ ਸਥਾਨ 'ਤੇ ਹਨ, ਜਿਨ੍ਹਾਂ ਨੇ 2007 ਵਿੱਚ ਇੰਗਲੈਂਡ ਖ਼ਿਲਾਫ਼ ਡਰਬਨ ਵਿੱਚ ਸਿਰਫ਼ 12 ਗੇਂਦਾਂ 'ਤੇ ਫਿਫਟੀ ਲਗਾਈ ਸੀ। 14 ਗੇਂਦਾਂ 'ਤੇ ਫਿਫਟੀ ਦੇ ਨਾਲ ਅਭਿਸ਼ੇਕ ਖੁਦ ਦੂਜੇ ਸਥਾਨ 'ਤੇ ਹਨ।

ਮੈਚ ਵਿੱਚ ਬਣੇ ਟਾਪ-9 ਰਿਕਾਰਡ

ਅਭਿਸ਼ੇਕ ਸ਼ਰਮਾ ਦੀ ਧਮਾਕੇਦਾਰ ਪਾਰੀ ਨੇ ਇਸ ਮੁਕਾਬਲੇ ਨੂੰ ਰਿਕਾਰਡਾਂ ਨਾਲ ਭਰ ਦਿੱਤਾ। 30 ਗੇਂਦਾਂ 'ਤੇ ਸੈਂਕੜਾ, ਪਾਵਰਪਲੇ ਵਿੱਚ 76 ਦੌੜਾਂ ਅਤੇ 16 ਗੇਂਦਾਂ 'ਤੇ ਫਿਫਟੀ ਉਨ੍ਹਾਂ ਦੀ ਪਾਰੀ ਦੀਆਂ ਸਭ ਤੋਂ ਵੱਡੀਆਂ ਖਾਸੀਅਤਾਂ ਰਹੀਆਂ।