ਇਟਲੀ ਦੇ ਸਕੂਲਾਂ ‘ਚ ਬੁਰਕਾ-ਨਕਾਬ ‘ਤੇ Ban, ਨਿਯਮ ਤੋੜਨ ਵਾਲੇ ਨੂੰ ਭਰਨਾ ਪਏਗਾ ਭਾਰੀ ਜ਼ੁਰਮਾਨਾ!

ਇਟਲੀ ਦੀ ਪ੍ਰਧਾਨ ਮੰਤਰੀ ਜੌਰਜੀਆ ਮੇਲੋਨੀ ਦੀ ਸਰਕਾਰ ਨੇ ਸਕੂਲਾਂ ਨਾਲ ਸਬੰਧਤ ਨਵੇਂ ਨਿਯਮਾਂ ਵਾਲੀ ਡਿਕਰੀ ਨੂੰ ਆਖਿਰਕਾਰ ਮਨਜ਼ੂਰੀ ਦੇ ਦਿੱਤੀ ਹੈ। ਇਸ ਤਹਿਤ ਸਕੂਲਾਂ ਵਿੱਚ ਬੁਰਕਾ ਅਤੇ ਨਕਾਬ ਵਰਗੇ ਚਿਹਰਾ ਪੂਰੀ ਤਰ੍ਹਾਂ ਢਕਣ ਵਾਲੇ ਕੱਪੜਿਆਂ 'ਤੇ ਪਾਬੰਦੀ ਲਗਾ ਦਿੱਤੀ ਗਈ ਹੈ।

ਨਿਯਮਾਂ ਦੀ ਉਲੰਘਣਾ ਕਰਨ 'ਤੇ 200 ਤੋਂ 1,000 ਯੂਰੋ ਤੱਕ ਜੁਰਮਾਨਾ ਹੋ ਸਕਦਾ ਹੈ। ਇੱਕ ਹੋਰ ਗੱਲ ਇਸ ਕਾਨੂੰਨ ਦੇ ਤਹਿਤ ਕਹੀ ਗਈ ਹੈ ਕਿ ਜੇਕਰ ਚਿਹਰਾ ਢਕਣ ਵਾਲਾ ਵਿਦਿਆਰਥੀ ਨਾਬਾਲਗ ਹੈ ਤਾਂ ਜੁਰਮਾਨਾ ਉਸ ਦੇ ਮਾਪਿਆਂ 'ਤੇ ਲਗਾਇਆ ਜਾ ਸਕਦਾ ਹੈ।

ਹਾਲਾਂਕਿ ਇਹ ਪਾਬੰਦੀ ਹਿਜਾਬ 'ਤੇ ਲਾਗੂ ਨਹੀਂ ਹੁੰਦੀ, ਕਿਉਂਕਿ ਹਿਜਾਬ ਵਿੱਚ ਆਮ ਤੌਰ 'ਤੇ ਸਿਰ ਅਤੇ ਵਾਲ ਢਕੇ ਜਾਂਦੇ ਹਨ, ਚਿਹਰਾ ਨਹੀਂ। ਡਿਕਰੀ ਦੇ ਮੁਤਾਬਕ ਜੇਕਰ ਨਾਬਾਲਗ ਵਿਦਿਆਰਥੀ ਸਕੂਲ ਵਿੱਚ ਚਿਹਰਾ ਢਕਣ ਵਾਲੀ ਪਾਬੰਦੀ ਦੀ ਉਲੰਘਣਾ ਕਰਦਾ ਹੈ ਤਾਂ ਜੁਰਮਾਨਾ ਉਸ ਦੇ ਮਾਪਿਆਂ 'ਤੇ ਲਗਾਇਆ ਜਾ ਸਕਦਾ ਹੈ।

ਇਸ ਤੋਂ ਇਲਾਵਾ, ਜਿਨ੍ਹਾਂ ਪਰਿਵਾਰਾਂ ਵਿੱਚ ਬੱਚੇ ਨੂੰ ਸਕੂਲ ਵਿੱਚ ਗੰਭੀਰ ਏਕੀਕਰਨ ਦੀ ਸਮੱਸਿਆ ਹੈ ਅਤੇ ਮਾਪਿਆਂ ਨੂੰ ਇਟਾਲੀਅਨ ਭਾਸ਼ਾ ਦੀ ਜਾਣਕਾਰੀ ਨਹੀਂ ਹੈ, ਉਨ੍ਹਾਂ ਲਈ ਭਾਸ਼ਾ ਕੋਰਸ ਨਾਲ ਜੁੜੇ ਨਿਯਮ ਵੀ ਲਿਆਂਦੇ ਗਏ ਹਨ।

ਹੁਣ ਸੰਸਦ ਦੀ ਮਨਜ਼ੂਰੀ ਵੀ ਜ਼ਰੂਰੀ

ਇਹ ਨਿਯਮ ਇਸ ਸਮੇਂ ਡਿਕਰੀ-ਲਾਅ ਦੇ ਰੂਪ ਵਿੱਚ ਲਾਗੂ ਹਨ। ਇਨ੍ਹਾਂ ਨੂੰ ਸਥਾਈ ਕਾਨੂੰਨ ਬਣਾਉਣ ਲਈ 60 ਦਿਨਾਂ ਦੇ ਅੰਦਰ ਇਟਲੀ ਦੀ ਸੰਸਦ ਤੋਂ ਮਨਜ਼ੂਰੀ ਲੈਣੀ ਹੋਵੇਗੀ। ਇਟਲੀ ਵਿੱਚ ਇਮੀਗ੍ਰੇਸ਼ਨ ਅਤੇ ਵਿਦੇਸ਼ੀ ਲੋਕਾਂ ਦਾ ਮੁੱਦਾ ਪਹਿਲਾਂ ਹੀ ਸਿਆਸੀ ਚਰਚਾ ਦਾ ਵੱਡਾ ਹਿੱਸਾ ਹੈ। ਮੇਲੋਨੀ ਦੀ ਸਰਕਾਰ ਵੱਲੋਂ ਸਕੂਲਾਂ ਵਿੱਚ ਬੁਰਕਾ-ਨਕਾਬ 'ਤੇ ਪਾਬੰਦੀ ਅਤੇ ਵਿਦੇਸ਼ੀ ਵਿਦਿਆਰਥੀਆਂ ਦੀ ਸੀਮਾ ਵਾਲੇ ਕਦਮ ਨੂੰ ਵੀ ਇਸੇ ਵਿਆਪਕ ਇਮੀਗ੍ਰੇਸ਼ਨ ਅਤੇ ਏਕੀਕਰਨ ਨੀਤੀ ਦੇ ਸੰਦਰਭ ਵਿੱਚ ਦੇਖਿਆ ਜਾ ਰਿਹਾ ਹੈ।

ਨਵੇਂ ਨਿਯਮਾਂ ਤਹਿਤ ਕੁਝ ਕਲਾਸਾਂ ਵਿੱਚ ਅਜਿਹੇ ਵਿਦੇਸ਼ੀ ਵਿਦਿਆਰਥੀਆਂ ਦੀ ਗਿਣਤੀ 30% ਤੱਕ ਸੀਮਤ ਕੀਤੀ ਜਾਵੇਗੀ, ਜਿਨ੍ਹਾਂ ਨੂੰ ਇਟਾਲੀਅਨ ਭਾਸ਼ਾ ਜਾਂ ਇਟਲੀ ਦੀ ਸਕੂਲੀ ਪ੍ਰਣਾਲੀ ਦਾ ਕਾਫ਼ੀ ਤਜਰਬਾ ਨਹੀਂ ਹੈ। ਇਹ 30% ਦੀ ਸੀਮਾ ਹਰ ਗੈਰ-ਇਟਾਲੀਅਨ ਵਿਦਿਆਰਥੀ 'ਤੇ ਲਾਗੂ ਨਹੀਂ ਹੋਵੇਗੀ। ਇਟਲੀ ਵਿੱਚ ਪੈਦਾ ਹੋਏ ਬੱਚਿਆਂ ਅਤੇ ਉੱਥੋਂ ਦੀ ਸਿੱਖਿਆ ਪ੍ਰਣਾਲੀ ਵਿੱਚ ਕਾਫ਼ੀ ਸਮਾਂ ਪੜ੍ਹ ਰਹੇ ਵਿਦਿਆਰਥੀਆਂ ਨੂੰ ਇਸ ਗਿਣਤੀ ਵਿੱਚ ਸ਼ਾਮਲ ਨਹੀਂ ਕੀਤਾ ਜਾਵੇਗਾ।

ਪ੍ਰਾਇਮਰੀ ਸਕੂਲਾਂ ਵਿੱਚ ਇਹ ਨਿਯਮ ਪਹਿਲੀ ਕਲਾਸਾਂ ਲਈ ਉਨ੍ਹਾਂ ਵਿਦਿਆਰਥੀਆਂ 'ਤੇ ਲਾਗੂ ਹੋਵੇਗਾ ਜੋ ਇਟਲੀ ਵਿੱਚ ਪੈਦਾ ਨਹੀਂ ਹੋਏ ਜਾਂ ਜਿਨ੍ਹਾਂ ਨੇ ਘੱਟੋ-ਘੱਟ ਦੋ ਸਾਲ ਪ੍ਰੀ-ਸਕੂਲ ਨਹੀਂ ਕੀਤਾ। ਸਰਕਾਰ ਦਾ ਕਹਿਣਾ ਹੈ ਕਿ ਇਨ੍ਹਾਂ ਨਿਯਮਾਂ ਦਾ ਮਕਸਦ ਵਿਦੇਸ਼ੀ ਵਿਦਿਆਰਥੀਆਂ ਨੂੰ ਇਟਲੀ ਦੀ ਸਕੂਲੀ ਪ੍ਰਣਾਲੀ ਵਿੱਚ ਬਿਹਤਰ ਢੰਗ ਨਾਲ ਸ਼ਾਮਲ ਕਰਨਾ ਅਤੇ ਉਨ੍ਹਾਂ ਦੀ ਇਟਾਲੀਅਨ ਭਾਸ਼ਾ ਸਿੱਖਣ ਵਿੱਚ ਮਦਦ ਕਰਨਾ ਹੈ।