1ਦਸੰਬਰ ਤੋਂ ਭਾਰਤੀ ਫੌਜ ਵਿੱਚ ਮੁੜ ਪਰਤੇਗੀ ਰਵਾਇਤੀ ਵਰਦੀ, 3 ਸਾਲ ਬਾਅਦ ਵਰਦੀ ਦੇ ਪੁਰਾਣੇ ਨਿਯਮ ਹੋਣਗੇ ਲਾਗੂ, ਪੜ੍ਹੋ ਪੂਰੀ ਖ਼ਬਰ
ਭਾਰਤੀ ਫੌਜ ਵਿੱਚ ਬ੍ਰਿਗੇਡੀਅਰ ਅਤੇ ਇਸ ਤੋਂ ਉੱਪਰ ਦੇ ਰੈਂਕ ਵਾਲੇ ਅਧਿਕਾਰੀਆਂ ਦੀ ਵਰਦੀ ਨੂੰ ਲੈ ਕੇ ਵੱਡਾ ਬਦਲਾਅ ਕੀਤਾ ਗਿਆ ਹੈ। ਫੌਜ ਦੇ ਮੁੱਖ ਦਫ਼ਤਰ ਨੇ ਕਰੀਬ ਤਿੰਨ ਸਾਲ ਪਹਿਲਾਂ ਲਾਗੂ ਕੀਤੇ ਗਏ ਸਾਂਝੇ ਡਰੈੱਸ ਕੋਡ ਨੂੰ ਵਾਪਸ ਲੈਣ ਦਾ ਫੈਸਲਾ ਕੀਤਾ ਹੈ।
ਹੁਣ ਸੀਨੀਅਰ ਅਧਿਕਾਰੀ ਸੇਰੇਮੋਨੀਅਲ ਅਤੇ ਵਰਕਿੰਗ ਡਰੈੱਸ ਵਿੱਚ ਮੁੜ ਆਪਣੀ ਰੈਜੀਮੈਂਟ ਅਤੇ ਸਰਵਿਸ ਦੇ ਰਵਾਇਤੀ ਵਰਦੀ ਨਿਯਮਾਂ ਦੀ ਪਾਲਣਾ ਕਰਨਗੇ। ਇਸ ਤਹਿਤ ਗੋਰਖਾ ਰਾਈਫਲਜ਼ ਦੇ ਅਧਿਕਾਰੀ ਆਪਣੀ ਰਵਾਇਤੀ ਟੋਪੀ, ਸਪੈਸ਼ਲ ਫੋਰਸਿਜ਼ ਦੇ ਅਧਿਕਾਰੀ ਮੈਰੂਨ ਬੇਰੇਟ ਅਤੇ ਆਰਮਰਡ ਰੈਜੀਮੈਂਟ ਦੇ ਅਧਿਕਾਰੀ ਕਾਲੀ ਬੇਰੇਟ ਪਹਿਨ ਸਕਣਗੇ।

1 ਦਸੰਬਰ ਤੋਂ ਲਾਗੂ ਹੋਣਗੇ ਦਿਸ਼ਾ-ਨਿਰਦੇਸ਼
ਫੌਜ ਦੇ ਮੁੱਖ ਦਫ਼ਤਰ ਦੀ ਐਡਜੂਟੈਂਟ ਜਨਰਲ (ਏਜੀ) ਬ੍ਰਾਂਚ ਵੱਲੋਂ ਇਸ ਸਬੰਧੀ 13 ਨਵੰਬਰ ਨੂੰ ਅਧਿਕਾਰਤ ਪੱਤਰ ਜਾਰੀ ਕੀਤਾ ਗਿਆ ਹੈ। ਨਵੇਂ ਦਿਸ਼ਾ-ਨਿਰਦੇਸ਼ 1 ਦਸੰਬਰ ਤੋਂ ਲਾਗੂ ਹੋਣਗੇ। ਨਵੇਂ ਹੁਕਮਾਂ ਮੁਤਾਬਕ ਬ੍ਰਿਗੇਡੀਅਰ ਅਤੇ ਇਸ ਤੋਂ ਉੱਪਰ ਦੇ ਅਧਿਕਾਰੀ ਸੇਰੇਮੋਨੀਅਲ ਡਰੈੱਸ ਨੰਬਰ 1 ਅਤੇ 2 ਦੇ ਨਾਲ-ਨਾਲ ਵਰਕਿੰਗ ਡਰੈੱਸ ਨੰਬਰ 3, 3(ਏ) ਅਤੇ 4 ਲਈ ਮੁੜ ਆਰਮੀ ਯੂਨੀਫਾਰਮਜ਼ ਪੈਂਫਲੈਟ-2018 ਦੇ ਨਿਯਮਾਂ ਦੀ ਪਾਲਣਾ ਕਰਨਗੇ।
ਹਾਲਾਂਕਿ, ਕੰਬੈਟ ਡਰੈੱਸ ਵਿੱਚ ਕੋਈ ਬਦਲਾਅ ਨਹੀਂ ਕੀਤਾ ਗਿਆ ਹੈ। ਇਸ ਸਬੰਧੀ 8 ਅਗਸਤ 2022 ਨੂੰ ਜਾਰੀ ਕੀਤੇ ਗਏ ਦਿਸ਼ਾ-ਨਿਰਦੇਸ਼ ਪਹਿਲਾਂ ਵਾਂਗ ਹੀ ਲਾਗੂ ਰਹਿਣਗੇ।
ਫੌਜ ਨੇ ਤਿੰਨ ਸਾਲ ਬਾਅਦ ਬਦਲਿਆ ਆਪਣਾ ਫੈਸਲਾ
ਭਾਰਤੀ ਫੌਜ ਨੇ ਅਪ੍ਰੈਲ 2023 ਵਿੱਚ ਹੋਈ ਆਰਮੀ ਕਮਾਂਡਰਜ਼ ਕਾਨਫਰੰਸ ਦੌਰਾਨ ਬ੍ਰਿਗੇਡੀਅਰ ਅਤੇ ਇਸ ਤੋਂ ਉੱਪਰ ਦੇ ਅਧਿਕਾਰੀਆਂ ਲਈ ਇੱਕ ਸਾਂਝੀ ਵਰਦੀ ਲਾਗੂ ਕਰਨ ਦਾ ਫੈਸਲਾ ਕੀਤਾ ਸੀ। ਉਸ ਸਮੇਂ ਫੌਜ ਮੁਖੀ ਜਨਰਲ ਮਨੋਜ ਪਾਂਡੇ ਸਨ। ਇਹ ਬਦਲਾਅ ਅਗਸਤ 2023 ਤੋਂ ਲਾਗੂ ਕੀਤਾ ਗਿਆ ਸੀ। ਇਸ ਫੈਸਲੇ ਦਾ ਮੁੱਖ ਉਦੇਸ਼ ਫੌਜ ਦੇ ਸੀਨੀਅਰ ਅਧਿਕਾਰੀਆਂ ਵਿੱਚ ਇੱਕੋ ਜਿਹੀ ਪਛਾਣ ਅਤੇ ਬਰਾਬਰੀ ਨੂੰ ਉਤਸ਼ਾਹਿਤ ਕਰਨਾ ਸੀ।
ਨਵੇਂ ਨਿਯਮਾਂ ਤਹਿਤ ਮੇਜਰ ਜਨਰਲ, ਲੈਫਟੀਨੈਂਟ ਜਨਰਲ ਅਤੇ ਫੌਜ ਮੁਖੀ ਸਮੇਤ ਬ੍ਰਿਗੇਡੀਅਰ ਤੇ ਇਸ ਤੋਂ ਉੱਪਰ ਦੇ ਸਾਰੇ ਅਧਿਕਾਰੀਆਂ ਲਈ ਇੱਕੋ ਜਿਹਾ ਡਰੈੱਸ ਕੋਡ ਤੈਅ ਕੀਤਾ ਗਿਆ ਸੀ। ਇਸ ਵਿਵਸਥਾ ਤਹਿਤ ਅਧਿਕਾਰੀਆਂ ਦੀਆਂ ਵੱਖ-ਵੱਖ ਰੈਜੀਮੈਂਟਾਂ ਅਤੇ ਸਰਵਿਸ ਨਾਲ ਜੁੜੀਆਂ ਰਵਾਇਤੀ ਪਛਾਣਾਂ ਨੂੰ ਹਟਾ ਦਿੱਤਾ ਗਿਆ ਸੀ। ਸਾਰੇ ਸੀਨੀਅਰ ਅਧਿਕਾਰੀਆਂ ਲਈ ਗੂੜ੍ਹੇ ਹਰੇ ਰੰਗ ਦੀ ਬੇਰੇਟ, ਇੱਕੋ ਜਿਹੀ ਬੈਲਟ, ਪਿੱਤਲ ਦੇ ਰੈਂਕ ਬੈਜ ਅਤੇ ਕਾਲੇ ਜੁੱਤੇ ਪਹਿਨਣ ਦਾ ਨਿਯਮ ਲਾਗੂ ਕੀਤਾ ਗਿਆ ਸੀ। ਇਸ ਤੋਂ ਇਲਾਵਾ ਮੋਢਿਆਂ 'ਤੇ ਪਹਿਨੀ ਜਾਣ ਵਾਲੀ ਲੈਨਯਾਰਡ ਅਤੇ ਰੈਜੀਮੈਂਟ ਨਾਲ ਜੁੜੀਆਂ ਕੁਝ ਹੋਰ ਸਹਾਇਕ ਚੀਜ਼ਾਂ ਵੀ ਹਟਾ ਦਿੱਤੀਆਂ ਗਈਆਂ ਸਨ।
ਹਾਲਾਂਕਿ, ਇਸ ਬਦਲਾਅ ਨੂੰ ਲੈ ਕੇ ਕੁਝ ਅਧਿਕਾਰੀਆਂ ਦਾ ਮੰਨਣਾ ਸੀ ਕਿ ਸਾਂਝੀ ਵਰਦੀ ਨਾਲ ਸੀਨੀਅਰ ਅਧਿਕਾਰੀਆਂ ਵਿੱਚ ਬਰਾਬਰੀ ਦੀ ਭਾਵਨਾ ਵਧੇਗੀ, ਜਦਕਿ ਦੂਜੇ ਅਧਿਕਾਰੀਆਂ ਦਾ ਕਹਿਣਾ ਸੀ ਕਿ ਇਸ ਨਾਲ ਰੈਜੀਮੈਂਟਾਂ ਅਤੇ ਸਰਵਿਸ ਨਾਲ ਜੁੜੀ ਰਵਾਇਤੀ ਪਛਾਣ ਕਮਜ਼ੋਰ ਹੋ ਰਹੀ ਹੈ।
ਅਧਿਕਾਰੀਆਂ ਤੋਂ ਮਿਲੇ ਫੀਡਬੈਕ ਤੋਂ ਬਾਅਦ ਲਿਆ ਗਿਆ ਫੈਸਲਾ
13 ਨਵੰਬਰ ਨੂੰ ਜਾਰੀ ਕੀਤੇ ਗਏ ਫੌਜ ਦੇ ਮੁੱਖ ਦਫ਼ਤਰ ਦੇ ਪੱਤਰ ਵਿੱਚ ਦੱਸਿਆ ਗਿਆ ਹੈ ਕਿ ਵੱਖ-ਵੱਖ ਖੇਤਰਾਂ ਤੋਂ ਮਿਲੇ ਫੀਡਬੈਕ ਦੇ ਆਧਾਰ 'ਤੇ ਵਰਦੀ ਸਬੰਧੀ ਨਿਰਦੇਸ਼ਾਂ ਦੀ ਵਿਆਪਕ ਸਮੀਖਿਆ ਕੀਤੀ ਗਈ ਹੈ। ਇਸ ਸਮੀਖਿਆ ਦਾ ਉਦੇਸ਼ ਸਾਰੇ ਰੈਂਕਾਂ ਵਿੱਚ ਵਰਦੀ ਦੀ ਇਕਸਾਰਤਾ ਅਤੇ ਫੌਜ ਦੀ ਸੰਸਥਾਗਤ ਪਛਾਣ ਵਿਚਕਾਰ ਸੰਤੁਲਨ ਬਣਾਈ ਰੱਖਣਾ ਸੀ। ਸਮੀਖਿਆ ਤੋਂ ਬਾਅਦ ਫੌਜ ਨੇ ਬ੍ਰਿਗੇਡੀਅਰ ਅਤੇ ਇਸ ਤੋਂ ਉੱਪਰ ਦੇ ਅਧਿਕਾਰੀਆਂ ਲਈ ਸੇਰੇਮੋਨੀਅਲ ਅਤੇ ਵਰਕਿੰਗ ਡਰੈੱਸ ਦੇ ਨਿਯਮ ਮੁੜ ਆਰਮੀ ਯੂਨੀਫਾਰਮਜ਼ ਪੈਂਫਲੈਟ-2018 ਅਨੁਸਾਰ ਲਾਗੂ ਕਰਨ ਦਾ ਫੈਸਲਾ ਕੀਤਾ ਹੈ।
ਗੋਰਖਾ ਰਾਈਫਲਜ਼ ਤੋਂ ਸਪੈਸ਼ਲ ਫੋਰਸਿਜ਼ ਤੱਕ ਮੁੜ ਦਿਖੇਗੀ ਪੁਰਾਣੀ ਪਛਾਣ
ਸਾਂਝੇ ਡਰੈੱਸ ਕੋਡ ਨੂੰ ਵਾਪਸ ਲੈਣ ਦਾ ਅਸਰ ਫੌਜ ਦੀਆਂ ਵੱਖ-ਵੱਖ ਰੈਜੀਮੈਂਟਾਂ ਅਤੇ ਸਰਵਿਸਾਂ ਦੇ ਅਧਿਕਾਰੀਆਂ ਦੀ ਵਰਦੀ 'ਤੇ ਦਿਖਾਈ ਦੇਵੇਗਾ। ਗੋਰਖਾ ਰਾਈਫਲਜ਼ ਦੇ ਸੀਨੀਅਰ ਅਧਿਕਾਰੀ ਮੁੜ ਆਪਣੀ ਰਵਾਇਤੀ ਟੋਪੀ ਪਹਿਨ ਸਕਣਗੇ। ਇਸੇ ਤਰ੍ਹਾਂ ਸਪੈਸ਼ਲ ਫੋਰਸਿਜ਼ ਦੇ ਅਧਿਕਾਰੀਆਂ ਲਈ ਮੈਰੂਨ ਬੇਰੇਟ ਅਤੇ ਆਰਮਰਡ ਰੈਜੀਮੈਂਟ ਦੇ ਅਧਿਕਾਰੀਆਂ ਲਈ ਕਾਲੀ ਬੇਰੇਟ ਪਹਿਨਣ ਦਾ ਰਾਹ ਸਾਫ਼ ਹੋ ਗਿਆ ਹੈ।
ਰੈਂਕ ਬੈਜ ਅਤੇ ਮੋਢਿਆਂ 'ਤੇ ਲੱਗਣ ਵਾਲੇ ਨਿਸ਼ਾਨ ਵੀ ਮੁੜ ਆਉਣਗੇ
2023 ਵਿੱਚ ਲਾਗੂ ਕੀਤੇ ਗਏ ਸਾਂਝੇ ਡਰੈੱਸ ਕੋਡ ਤਹਿਤ ਸੀਨੀਅਰ ਅਧਿਕਾਰੀਆਂ ਦੇ ਰੈਂਕ ਬੈਜ ਅਤੇ ਹੋਰ ਪਛਾਣ ਚਿੰਨ੍ਹਾਂ ਨੂੰ ਵੀ ਇੱਕੋ ਜਿਹਾ ਕਰ ਦਿੱਤਾ ਗਿਆ ਸੀ। ਇਸ ਕਾਰਨ ਉਨ੍ਹਾਂ ਦੀ ਰੈਜੀਮੈਂਟ ਜਾਂ ਸਰਵਿਸ ਦੀ ਵੱਖਰੀ ਪਛਾਣ ਵਰਦੀ 'ਤੇ ਦਿਖਾਈ ਨਹੀਂ ਦਿੰਦੀ ਸੀ। ਹੁਣ ਪੁਰਾਣੇ ਨਿਯਮ ਮੁੜ ਲਾਗੂ ਹੋਣ ਤੋਂ ਬਾਅਦ ਵੱਖ-ਵੱਖ ਰੈਜੀਮੈਂਟਾਂ ਦੇ ਅਧਿਕਾਰੀ ਆਪਣੇ ਰਵਾਇਤੀ ਰੈਂਕ ਬੈਜ ਅਤੇ ਸ਼ੋਲਡਰ ਟਾਈਟਲ ਮੁੜ ਪਹਿਨ ਸਕਣਗੇ।
ਗੋਰਖਾ ਰਾਈਫਲਜ਼, ਗੜ੍ਹਵਾਲ ਰਾਈਫਲਜ਼ ਅਤੇ ਰਾਜਪੂਤਾਨਾ ਰਾਈਫਲਜ਼ ਵਰਗੀਆਂ ਰਾਈਫਲ ਰੈਜੀਮੈਂਟਾਂ ਦੇ ਅਧਿਕਾਰੀਆਂ ਲਈ ਕਾਲੇ ਰੰਗ ਦੇ ਰੈਂਕ ਬੈਜ ਵੀ ਮੁੜ ਵਾਪਸ ਆਉਣਗੇ। ਸਾਂਝੀ ਵਰਦੀ ਵਿਵਸਥਾ ਤਹਿਤ ਇਨ੍ਹਾਂ ਦੀ ਥਾਂ ਸੁਨਹਿਰੀ ਰੰਗ ਦੇ ਬੈਜ ਵਰਤੇ ਜਾ ਰਹੇ ਸਨ।


Click it and Unblock the Notifications
