CSK ਦੇ ਨਵੇਂ ਹੈੱਡ ਕੋਚ ਬਣੇ ਜ਼ਹੀਰ ਖਾਨ, ਸਟੀਫਨ ਫਲੇਮਿੰਗ ਦੀ ਲੈਣਗੇ ਜਗ੍ਹਾ

ਸਾਬਕਾ ਭਾਰਤੀ ਤੇਜ਼ ਗੇਂਦਬਾਜ਼ ਜ਼ਹੀਰ ਖਾਨ ਚੇਨਈ ਸੁਪਰ ਕਿੰਗਜ਼ (CSK) ਦੇ ਨਵੇਂ ਹੈੱਡ ਕੋਚ ਹੋਣਗੇ। ਫ੍ਰੈਂਚਾਈਜ਼ੀ ਨੇ ਸੋਮਵਾਰ ਨੂੰ ਇਸ ਦਾ ਐਲਾਨ ਕੀਤਾ। ਜ਼ਹੀਰ ਹੁਣ ਸਟੀਫਨ ਫਲੇਮਿੰਗ ਦੀ ਜਗ੍ਹਾ ਲੈਣਗੇ। ਫਲੇਮਿੰਗ 2009 ਤੋਂ 2026 ਤੱਕ CSK ਦੇ ਹੈੱਡ ਕੋਚ ਰਹੇ।

ਜ਼ਹੀਰ ਖਾਨ ਲਈ ਇਹ ਪਹਿਲੀ ਵਾਰ ਹੋਵੇਗਾ ਜਦੋਂ ਉਹ IPL ਵਿੱਚ ਕਿਸੇ ਫ੍ਰੈਂਚਾਈਜ਼ੀ ਦੇ ਹੈੱਡ ਕੋਚ ਦੀ ਜ਼ਿੰਮੇਵਾਰੀ ਸੰਭਾਲਣਗੇ। ਹਾਲਾਂਕਿ, ਉਹ ਪਿਛਲੇ ਕਈ ਸਾਲਾਂ ਤੋਂ ਟੀਮ ਮੈਨੇਜਮੈਂਟ ਅਤੇ ਖਿਡਾਰੀਆਂ ਦੇ ਵਿਕਾਸ ਨਾਲ ਜੁੜੇ ਰਹੇ ਹਨ।

ਉਹ ਮੁੰਬਈ ਇੰਡੀਅਨਜ਼ ਵਿੱਚ ਕ੍ਰਿਕਟ ਆਪਰੇਸ਼ਨਜ਼ ਦੇ ਡਾਇਰੈਕਟਰ ਰਹਿ ਚੁੱਕੇ ਹਨ। ਇਸ ਤੋਂ ਬਾਅਦ ਉਨ੍ਹਾਂ ਨੇ ਟੀਮ ਦੇ ਗਲੋਬਲ ਡਿਵੈਲਪਮੈਂਟ ਵਿਭਾਗ ਦੀ ਜ਼ਿੰਮੇਵਾਰੀ ਵੀ ਸੰਭਾਲੀ। IPL 2025 ਵਿੱਚ ਜ਼ਹੀਰ ਨੇ ਲਖਨਊ ਸੁਪਰ ਜਾਇੰਟਸ (LSG) ਦੇ ਮੈਂਟਰ ਵਜੋਂ ਕੰਮ ਕੀਤਾ ਸੀ। ਜ਼ਹੀਰ ਖਾਨ ਨੇ IPL ਕਰੀਅਰ ਦੌਰਾਨ ਰਾਇਲ ਚੈਲੰਜਰਜ਼ ਬੈਂਗਲੁਰੂ, ਮੁੰਬਈ ਇੰਡੀਅਨਜ਼ ਅਤੇ ਦਿੱਲੀ ਡੇਅਰਡੇਵਿਲਜ਼ ਲਈ ਖੇਡਿਆ।

2008 ਤੋਂ 2017 ਵਿਚਾਲੇ ਉਨ੍ਹਾਂ ਨੇ IPL ਵਿੱਚ ਕੁੱਲ 100 ਮੈਚ ਖੇਡੇ ਅਤੇ 102 ਵਿਕਟਾਂ ਹਾਸਲ ਕੀਤੀਆਂ। ਇਸ ਦੌਰਾਨ ਉਨ੍ਹਾਂ ਦਾ ਇਕਾਨਮੀ ਰੇਟ 7.59 ਰਿਹਾ। 2017 ਵਿੱਚ ਦਿੱਲੀ ਡੇਅਰਡੇਵਿਲਜ਼ ਲਈ ਖੇਡਣ ਤੋਂ ਬਾਅਦ ਜ਼ਹੀਰ ਨੇ ਕ੍ਰਿਕਟ ਦੇ ਸਾਰੇ ਫਾਰਮੈਟਾਂ ਤੋਂ ਸੰਨਿਆਸ ਲੈ ਲਿਆ ਸੀ। ਜ਼ਹੀਰ ਖਾਨ ਨੇ ਭਾਰਤ ਲਈ 92 ਟੈਸਟ, 200 ਵਨਡੇ ਅਤੇ 17 ਟੀ-20 ਇੰਟਰਨੈਸ਼ਨਲ ਮੈਚ ਖੇਡੇ। ਉਹ 2011 ਵਿੱਚ ਵਨਡੇ ਵਿਸ਼ਵ ਕੱਪ ਜਿੱਤਣ ਵਾਲੀ ਭਾਰਤੀ ਟੀਮ ਦੇ ਮੁੱਖ ਤੇਜ਼ ਗੇਂਦਬਾਜ਼ਾਂ ਵਿੱਚੋਂ ਇੱਕ ਸਨ।

ਮੁੰਬਈ ਇੰਡੀਅਨਜ਼ ਨਾਲ ਵੀ ਜੁੜੇ ਰਹੇ

ਮੁੰਬਈ ਇੰਡੀਅਨਜ਼ ਨੇ ਦਸੰਬਰ 2018 ਵਿੱਚ ਜ਼ਹੀਰ ਖਾਨ ਨੂੰ ਡਾਇਰੈਕਟਰ ਆਫ਼ ਕ੍ਰਿਕਟ ਆਪਰੇਸ਼ਨਜ਼ ਨਿਯੁਕਤ ਕੀਤਾ ਸੀ। ਬਾਅਦ ਵਿੱਚ ਉਹ ਟੀਮ ਦੇ ਹੈੱਡ ਆਫ਼ ਗਲੋਬਲ ਡਿਵੈਲਪਮੈਂਟ ਬਣੇ। ਇਸ ਭੂਮਿਕਾ ਵਿੱਚ ਉਨ੍ਹਾਂ ਦੀ ਜ਼ਿੰਮੇਵਾਰੀ ਸਿਰਫ਼ ਸੀਨੀਅਰ ਟੀਮ ਤੱਕ ਸੀਮਤ ਨਹੀਂ ਸੀ, ਸਗੋਂ ਨਵੇਂ ਖਿਡਾਰੀਆਂ ਦੀ ਪਛਾਣ ਕਰਨ ਅਤੇ ਉਨ੍ਹਾਂ ਦੇ ਵਿਕਾਸ 'ਤੇ ਵੀ ਕੰਮ ਕਰਨਾ ਸ਼ਾਮਲ ਸੀ। ਮੁੰਬਈ ਇੰਡੀਅਨਜ਼ ਨਾਲ ਉਨ੍ਹਾਂ ਦਾ ਕਾਰਜਕਾਲ 2018 ਤੋਂ 2022 ਤੱਕ ਰਿਹਾ। ਇਸ ਤੋਂ ਬਾਅਦ ਉਹ ਕੁਝ ਸਮੇਂ ਲਈ IPL ਦੀ ਕਮੈਂਟਰੀ ਟੀਮ ਦਾ ਵੀ ਹਿੱਸਾ ਰਹੇ।