ਏਸ਼ੀਆਈ ਖੇਡਾਂ ਤੋਂ ਪਹਿਲਾਂ ਭਾਰਤ ਨੂੰ ਵੱਡਾ ਝਟਕਾ, 2 ਖਿਡਾਰੀ ਡੋਪਿੰਗ ਮਾਮਲੇ ’ਚ ਫਸੇ

ਏਸ਼ੀਆਈ ਖੇਡਾਂ ਤੋਂ ਪਹਿਲਾਂ ਭਾਰਤ ਦੇ ਦੋ ਖੇਡਾਂ ਨਾਲ ਜੁੜੇ ਖਿਡਾਰੀਆਂ ਦੇ ਡੋਪਿੰਗ ਮਾਮਲੇ ਸਾਹਮਣੇ ਆਏ ਹਨ। 17 ਸਾਲਾ ਭਾਰਤੀ ਤੈਰਾਕ ਦੇ ਸੈਂਪਲ ਵਿੱਚ ਪਾਬੰਦੀਸ਼ੁਦਾ ਟਰਬਿਊਟਾਲਾਈਨ (Terbutaline) ਮਿਲਣ ਤੋਂ ਬਾਅਦ ਉਸ 'ਤੇ 18 ਮਹੀਨਿਆਂ ਦੀ ਪਾਬੰਦੀ ਲਗਾਈ ਗਈ ਹੈ। ਇਸ ਕਾਰਨ ਉਹ ਏਸ਼ੀਆਈ ਖੇਡਾਂ ਵਿੱਚ ਹਿੱਸਾ ਨਹੀਂ ਲੈ ਸਕੇਗਾ। ਨਾਬਾਲਗ ਹੋਣ ਕਾਰਨ ਤੈਰਾਕ ਦਾ ਨਾਮ ਜਨਤਕ ਨਹੀਂ ਕੀਤਾ ਗਿਆ।

ਤੈਰਾਕ ਦੇ ਸੈਂਪਲ ਵਿੱਚ ਫਰਵਰੀ ਮਹੀਨੇ ਟਰਬਿਊਟਾਲਾਈਨ ਮਿਲੀ ਸੀ। ਇਹ ਐਂਟੀ-ਡੋਪਿੰਗ ਨਿਯਮਾਂ ਤਹਿਤ ਪਾਬੰਦੀਸ਼ੁਦਾ ਬੀਟਾ-2 ਐਗੋਨਿਸਟ ਹੈ। ਇਸ ਤੋਂ ਬਾਅਦ ਉਸ ਦਾ ਨਾਮ ਏਸ਼ੀਆਈ ਖੇਡਾਂ ਦੀ ਸੰਭਾਵਿਤ ਟੀਮ ਵਿੱਚੋਂ ਹਟਾ ਦਿੱਤਾ ਗਿਆ ਸੀ। ਮਾਮਲੇ ਦੀ ਸੁਣਵਾਈ ਪਿਛਲੇ ਹਫ਼ਤੇ ਹੋਈ ਅਤੇ ਬੁੱਧਵਾਰ ਸਵੇਰੇ ਉਸ 'ਤੇ 18 ਮਹੀਨਿਆਂ ਦੀ ਪਾਬੰਦੀ ਲਗਾ ਦਿੱਤੀ ਗਈ। ਸਵਿਮਿੰਗ ਫੈਡਰੇਸ਼ਨ ਆਫ ਇੰਡੀਆ (SFI) ਨੇ ਮਾਮਲੇ ਦੀ ਜਲਦ ਸੁਣਵਾਈ ਦੀ ਮੰਗ ਕੀਤੀ ਸੀ, ਤਾਂ ਜੋ ਜੇਕਰ ਉਸ ਨੂੰ ਰਾਹਤ ਮਿਲਦੀ ਤਾਂ ਉਸ ਨੂੰ ਏਸ਼ੀਆਈ ਖੇਡਾਂ ਦੀ ਟੀਮ ਵਿੱਚ ਸ਼ਾਮਲ ਕੀਤਾ ਜਾ ਸਕੇ।

ਖਾਸ ਗੱਲ ਇਹ ਹੈ ਕਿ ਇਸ ਤੈਰਾਕ ਦਾ ਜੁੜਵਾਂ ਭਰਾ ਭਾਰਤੀ ਏਸ਼ੀਆਈ ਖੇਡਾਂ ਦੀ ਟੀਮ ਦਾ ਹਿੱਸਾ ਹੈ ਅਤੇ ਜਾਪਾਨ ਵਿੱਚ ਭਾਰਤ ਦੀ ਨੁਮਾਇੰਦਗੀ ਕਰੇਗਾ। 17 ਸਾਲਾ ਤੈਰਾਕ ਨੇ ਏਸ਼ੀਆਈ ਖੇਡਾਂ ਲਈ ਦੋ ਇਵੈਂਟਾਂ ਵਿੱਚ ਕੁਆਲੀਫਾਈ ਕੀਤਾ ਸੀ।

ਇਸੇ ਦੌਰਾਨ 25 ਸਾਲਾ ਗ੍ਰੀਕੋ-ਰੋਮਨ ਪਹਿਲਵਾਨ ਦੀਪਕ ਵੀ ਡੋਪਿੰਗ ਮਾਮਲੇ ਵਿੱਚ ਘਿਰ ਗਏ ਹਨ। ਦਿੱਲੀ ਨਾਲ ਸਬੰਧਤ ਦੀਪਕ ਦੇ 31 ਮਈ ਨੂੰ ਲਖਨਊ ਵਿੱਚ ਹੋਏ ਏਸ਼ੀਆਈ ਖੇਡਾਂ ਦੇ ਚੋਣ ਟਰਾਇਲ ਦੌਰਾਨ ਲਏ ਗਏ ਯੂਰੀਨ ਸੈਂਪਲ ਵਿੱਚ ਪਾਬੰਦੀਸ਼ੁਦਾ ਕਲੋਮੀਫੀਨ (Clomiphene) ਪਾਇਆ ਗਿਆ ਹੈ। ਇਹ ਪਦਾਰਥ 2026 ਦੀ ਵਿਸ਼ਵ ਐਂਟੀ-ਡੋਪਿੰਗ ਏਜੰਸੀ (WADA) ਦੀ ਪਾਬੰਦੀਸ਼ੁਦਾ ਸੂਚੀ ਵਿੱਚ S4 ਸ਼੍ਰੇਣੀ ਅਧੀਨ ਸ਼ਾਮਲ ਹੈ।

ਨਾਡਾ (NADA) ਮੁਤਾਬਕ ਦੀਪਕ ਦੇ ਸੈਂਪਲ ਵਿੱਚ 23 ਜੁਲਾਈ ਨੂੰ ਅਸਧਾਰਨ ਨਤੀਜਾ ਸਾਹਮਣੇ ਆਇਆ ਸੀ। ਇਸ ਤੋਂ ਬਾਅਦ ਜਾਂਚ ਕੀਤੀ ਗਈ ਅਤੇ 17 ਅਗਸਤ ਨੂੰ ਦੀਪਕ ਦਾ ਇੰਟਰਵਿਊ ਵੀ ਹੋਇਆ। ਹਾਲਾਂਕਿ, ਦੀਪਕ 'ਤੇ ਫਿਲਹਾਲ ਅਸਥਾਈ ਪਾਬੰਦੀ ਨਹੀਂ ਲਗਾਈ ਗਈ। ਉਨ੍ਹਾਂ ਨੂੰ ਬੀ ਸੈਂਪਲ ਦੀ ਜਾਂਚ ਕਰਵਾਉਣ ਦਾ ਅਧਿਕਾਰ ਹੈ।

ਦੀਪਕ ਨੇ 31 ਮਈ ਨੂੰ ਲਖਨਊ ਵਿੱਚ ਹੋਏ ਚੋਣ ਟਰਾਇਲ ਵਿੱਚ ਜਿੱਤ ਹਾਸਲ ਕਰਕੇ ਏਸ਼ੀਆਈ ਖੇਡਾਂ ਦੀ ਟੀਮ ਵਿੱਚ ਜਗ੍ਹਾ ਬਣਾਈ ਸੀ। ਹੁਣ ਮਾਮਲੇ ਦੀ ਅੰਤਿਮ ਜਾਂਚ ਤੋਂ ਬਾਅਦ ਹੀ ਤੈਅ ਹੋਵੇਗਾ ਕਿ ਉਨ੍ਹਾਂ ਖ਼ਿਲਾਫ਼ ਡੋਪਿੰਗ ਨਿਯਮਾਂ ਤਹਿਤ ਅੱਗੇ ਕੀ ਕਾਰਵਾਈ ਕੀਤੀ ਜਾਵੇਗੀ।