ਹੁਣ ਫ਼ਿਲਮਾਂ ’ਚ ਨਹੀਂ ਚੱਲੇਗਾ ਇਹ ਸਭ! ਸਰਕਾਰ ਨੇ ਜਾਰੀ ਕੀਤੀ ਨਵੀਂ ਗਾਈਡਲਾਈਨ, ਸੈਂਸਰਸ਼ਿਪ ਦੇ ਨਿਯਮ ਹੋਏ ਸਖ਼ਤ

ਭਾਰਤੀ ਫ਼ਿਲਮਾਂ ਦੇ ਸਰਟੀਫਿਕੇਸ਼ਨ ਨੂੰ ਲੈ ਕੇ ਸੂਚਨਾ ਅਤੇ ਪ੍ਰਸਾਰਣ ਮੰਤਰਾਲੇ ਨੇ ਨਵੀਂ ਗਾਈਡਲਾਈਨ ਜਾਰੀ ਕੀਤੀ ਹੈ। ਨਵੀਂ ਗਾਈਡਲਾਈਨਜ਼ ਵਿੱਚ ਫ਼ਿਲਮਾਂ ਦੀ ਰਚਨਾਤਮਕ ਆਜ਼ਾਦੀ, ਸਮਾਜਿਕ ਜ਼ਿੰਮੇਵਾਰੀ, ਉਮਰ ਅਨੁਸਾਰ ਰੇਟਿੰਗ ਅਤੇ ਸੰਵੇਦਨਸ਼ੀਲ ਕੰਟੈਂਟ ਨਾਲ ਜੁੜੇ ਨਿਯਮਾਂ ਨੂੰ ਹੋਰ ਸਪੱਸ਼ਟ ਕੀਤਾ ਗਿਆ ਹੈ।

ਨਵੀਂ ਗਾਈਡਲਾਈਨ ਨੇ 1991 ਵਿੱਚ ਬਣਾਏ ਗਏ ਪੁਰਾਣੇ ਨਿਯਮਾਂ ਦੀ ਥਾਂ ਲੈ ਲਈ ਹੈ। ਹਾਲਾਂਕਿ ਸੈਂਸਰਸ਼ਿਪ ਦੇ ਪੁਰਾਣੇ ਪ੍ਰਬੰਧਾਂ ਨੂੰ ਪੂਰੀ ਤਰ੍ਹਾਂ ਨਹੀਂ ਬਦਲਿਆ ਗਿਆ, ਪਰ ਰਚਨਾਤਮਕ ਆਜ਼ਾਦੀ, ਸਮਾਜਿਕ ਬਦਲਾਅ, ਉਮਰ ਦੇ ਹਿਸਾਬ ਨਾਲ ਰੇਟਿੰਗ ਅਤੇ ਕੰਟੈਂਟ ਨਾਲ ਜੁੜੇ ਨਿਯਮਾਂ ਨੂੰ ਨਵੇਂ ਤਰੀਕੇ ਨਾਲ ਸਪੱਸ਼ਟ ਕੀਤਾ ਗਿਆ ਹੈ।ਨਵੀਂ ਗਾਈਡਲਾਈਨ ਮੁਤਾਬਕ ਫ਼ਿਲਮਾਂ ਵਿੱਚ ਹਿੰਸਾ ਅਤੇ ਅਪਰਾਧ ਦਾ ਮਹਿਮਾ ਮੰਡਨ, ਬੱਚਿਆਂ ਨਾਲ ਦੁਰਵਿਵਹਾਰ, ਜਾਨਵਰਾਂ ਨਾਲ ਬੇਲੋੜੀ ਕ੍ਰੂਰਤਾ ਅਤੇ ਦਿਵਿਆਂਗ ਲੋਕਾਂ ਦੇ ਅਪਮਾਨਜਨਕ ਚਿੱਤਰਣ ਤੋਂ ਬਚਣਾ ਹੋਵੇਗਾ।

ਇਸੇ ਤਰ੍ਹਾਂ ਸ਼ਰਾਬ, ਡਰੱਗਜ਼ ਅਤੇ ਸਿਗਰਟਨੋਸ਼ੀ ਨੂੰ ਗਲੈਮਰਾਈਜ਼ ਕਰਨ 'ਤੇ ਵੀ ਪਾਬੰਦੀਆਂ ਹਨ। ਯੌਨ ਹਿੰਸਾ ਦੇ ਗ੍ਰਾਫਿਕ ਦ੍ਰਿਸ਼ਾਂ ਅਤੇ ਔਰਤਾਂ ਨੂੰ ਅਪਮਾਨਜਨਕ ਢੰਗ ਨਾਲ ਦਿਖਾਉਣ ਵਾਲੇ ਕੰਟੈਂਟ 'ਤੇ ਵੀ ਸਖ਼ਤੀ ਰਹੇਗੀ। ਧਰਮ, ਨਸਲ ਜਾਂ ਭਾਈਚਾਰੇ ਖ਼ਿਲਾਫ਼ ਅਪਮਾਨਜਨਕ ਸਮੱਗਰੀ, ਫ਼ਿਰਕਾਪ੍ਰਸਤੀ, ਅੰਧਵਿਸ਼ਵਾਸ ਅਤੇ ਦੇਸ਼ ਦੀ ਸੁਰੱਖਿਆ ਜਾਂ ਜਨਤਕ ਵਿਵਸਥਾ ਨੂੰ ਪ੍ਰਭਾਵਿਤ ਕਰਨ ਵਾਲੇ ਕੰਟੈਂਟ ਸਬੰਧੀ ਨਿਯਮ ਵੀ ਲਾਗੂ ਰਹਿਣਗੇ।

ਫ਼ਿਲਮਾਂ ਲਈ U/A 7+, U/A 13+ ਅਤੇ U/A 16+ ਵਰਗੀਆਂ ਉਮਰ-ਆਧਾਰਿਤ ਸ਼੍ਰੇਣੀਆਂ ਵੀ ਲਾਗੂ ਹਨ। ਗਾਈਡਲਾਈਨ ਵਿੱਚ ਸਰਟੀਫਿਕੇਸ਼ਨ ਦੌਰਾਨ ਸਮਾਜਿਕ ਜ਼ਿੰਮੇਵਾਰੀ ਅਤੇ ਫ਼ਿਲਮਕਾਰਾਂ ਦੀ ਰਚਨਾਤਮਕ ਆਜ਼ਾਦੀ ਵਿਚਕਾਰ ਸੰਤੁਲਨ ਬਣਾਉਣ 'ਤੇ ਵੀ ਜ਼ੋਰ ਦਿੱਤਾ ਗਿਆ ਹੈ।

ਅਦਾਲਤ ਅਤੇ ਮਾਨਹਾਨੀ ਨਾਲ ਜੁੜੇ ਨਿਯਮ

ਫ਼ਿਲਮਾਂ ਵਿੱਚ ਮਾਨਹਾਨੀ ਅਤੇ ਅਦਾਲਤ ਦੀ ਤੌਹੀਨ ਨਾਲ ਜੁੜੇ ਕੰਟੈਂਟ 'ਤੇ ਵੀ ਪਾਬੰਦੀਆਂ ਹਨ। ਅਜਿਹੀ ਸਮੱਗਰੀ ਜੋ ਅਦਾਲਤਾਂ ਪ੍ਰਤੀ ਅਪਮਾਨ ਜਾਂ ਅਨਾਦਰ ਪੈਦਾ ਕਰੇ ਜਾਂ ਉਨ੍ਹਾਂ ਦੀ ਮਰਿਆਦਾ ਨੂੰ ਕਮਜ਼ੋਰ ਕਰੇ, ਉਸ ਨੂੰ ਅਵਮਾਨਨਾ ਦੇ ਦਾਇਰੇ ਵਿੱਚ ਦੇਖਿਆ ਜਾ ਸਕਦਾ ਹੈ।